പ്രണയം നീ ആണോ..?

നിന്നോടുള്ള എന്റെ പ്രണയം
ഞാൻ എന്റെ കണ്ണുകളിൽ
ഒളിപ്പിക്കുന്നു ആഴത്തിൽ
എന്റെ മനസ്സിൽ നിന്നോർമകൾ
വിടരുന്നതും ഒളിപ്പിക്കുന്നു
ഒരു കടലിന്റെ ആഴവും, പരപ്പും,
ദൂരവുമുണ്ടതിലേക്ക് ചെല്ലാൻ
അതിനുള്ളിലാണെന്റെ തോഴൻ
പ്രണയത്തിന്റെ ആഴവും പരപ്പും
ചിപ്പിക്കുളിൽ വെള്ളത്തുള്ളി പോൽ
ഒരു പക്ഷെ നാളെ ഈ കടലിൽ
അലിഞ്ഞു ഒരു മഴയായി പെയ്തേക്കാം
അല്ലെങ്കിൽ ചിപ്പിയിൽ അടഞ്ഞു
നാളുകൾക്കപ്പുറം ഒരു മുത്തായേക്കാം
വിലപിടിച്ചൊരു കണ്ണീർ മുത്ത്‌
ചിപ്പിയുടെ സ്വന്തം കണ്ണീർ മുത്ത്‌ ..
കടലിന്റെ ആഴവും പരപ്പും
അറിഞ്ഞു നീ വരുമ്പോൾ മാത്രം..
നിനക്കതെടുക്കാം എന്നെന്നേക്കുമായി
അവിടെ വച്ച് മാത്രം നീ അറിയും
എന്റെ പ്രണയം മഴയോ മുത്തോ
അപ്പോൾ മാത്രം ഞാനും അറിയും
എന്റെ പ്രണയം നീയാണോയെന്നും ..?