Thursday 6 March 2014

ഓര്‍മ്മക്കുറിപ്പുകള്‍- 9

ഓര്‍മ്മക്കുറിപ്പുകള്‍ - 9
---------------------------------
ഒന്‍പതാം ക്ലാസ്സിലേക്ക് ..
പത്തിലേക്ക് പാസ്സാകുമോ എന്ന ചിന്തയാരുന്നു ... പഠിത്തം ഉഴപ്പാരുന്നു..!
ശരാശരി മാര്‍ക്കും വാങ്ങി ഇരുന്നാല്‍ കേറ്റി വിടില്ല .. എന്റെ കൂട്ടായി ഇവിടെ തന്നെ ഇരുന്നോ എന്ന് ക്ലാസ്സ്‌ ടീച്ചര്‍ ഏലിയാമ്മ .. ഹും .. പരീക്ഷ പാസാകണം .. പഠിക്കാന്‍ മടിയും ! . ജാതകത്തില്‍ പറയുന്നു .. പഠിത്തം ഉഴപ്പും എന്ന് ! അവസാനം സഹികെട്ട് അച്ഛനും അമ്മയും കൂടി ജ്യോത്സ്യരുടെ അടുത്തേക്ക് ! ചരട് വാങ്ങുന്നു .. സാരസ്വതഘൃതം നെയ്യ് വാങ്ങുന്നു ... പൂജിക്കുന്നു ... ഏലസ്സ് കെട്ടിക്കുന്നു ! എന്റെ മഹത്തായ സസ്യാഹാര ജീവിതം അവിടെ തുടങ്ങുകയായി . എല്ലാം ഗൌഡ സരസ്വത ബ്രാഹ്മണ കുട്ടികളും കൂട്ടുകാര്‍ ആയി . തികഞ്ഞ സസ്യഭുക്ക് ആയതോടെ അവര്‍ക്കെല്ലാം എന്നോട് സ്നേഹവും കൂടി !
ഇപ്പോഴും പഠനത്തില്‍ പിന്നോക്കമാകുന്ന കുട്ടികള്‍ക്ക് ഫലപ്രദമാണ് ആ നെയ്യ് സേവ ! രാവിലെ കുളിച്ചു വെറും വയറ്റില്‍ സേവിക്കണം . സസ്യാഹാരം മാത്രമേ പാടുള്ളൂ ! അപ്പോള്‍ മുതല്‍ ആണ് സരസ്വതി മന്ത്രം കൂടെ കൂട്ടിയത് . പ്രയോജനമുണ്ടായി ..അതിപ്പോള്‍ എംഫില്‍ എത്തി നില്‍ക്കുന്നു !
പൊക്കക്കുറവു മാറി .. എന്നിലും മാറ്റങ്ങള്‍ കണ്ടു തുടങ്ങി ! ബാല്യം വിട്ടു വളര്‍ച്ചയുടെ കൌമാരത്തിലേക്ക് ! ... എങ്കിലും മറ്റുകുട്ടികളുടെ രഹസ്യ ഭാഷണങ്ങളിലേക്ക് ഇടം കിട്ടി തുടങ്ങിയില്ല . എങ്കിലും പതിയെ ഞാനും കാര്യങ്ങള്‍ ഗ്രഹിക്കാന്‍ തുടങ്ങി . ഫെമിന എന്ന എന്റെ കൂട്ടുകാരി ആണ് .. പെണ്‍കുട്ടികള്‍ വളരുമ്പോള്‍ ശ്രദ്ധിക്കേണ്ട കാര്യങ്ങള്‍ ആദ്യമായി പറഞ്ഞു തരുന്നത് .. അതും എന്താ .. ഏതാ എന്നൊക്കെ ചോദിച്ചു കുറെ പിറകെ നടന്നതില്‍ പിന്നെ . അതിനവള്‍ക്ക് കൈക്കൂലി കൊടുക്കേണ്ടിയും വന്നു ഹക്കിള്‍ബറിയുടെ കഥാപുസ്തകം !
ട്യൂഷന്‍ പോയിത്തുടങ്ങി ഞാനും ! മൂത്ത ചേട്ടനും കൂട്ടുകാരും ഉണ്ടായിരുന്നു അവിടെ . ചേട്ടന്റെ കൂട്ടുകാരിലൂടെ ആണ് .. അത്രയും നാള്‍ ഗേള്‍സ്‌ സ്കൂളില്‍ പഠിച്ചിട്ടും ആണ്‍കുട്ടികള്‍ നല്ല കൂട്ടുകാര്‍ ആകുമെന്നും പേടിച്ചു മാറ്റി നിറുത്തേണ്ടവരല്ലെന്നും ഞാന്‍ അറിഞ്ഞു തുടങ്ങിയത് . ഹരികൃഷ്ണന്‍ എന്ന പട്ടരു കുട്ടി .. ആനന്ദ്‌ .. റോഷന്‍ അങ്ങിനെ ചേട്ടന്റെ കൂട്ടുകാര്‍ എന്റെയും നല്ല കൂട്ടുകാര്‍ ആയി . അവരൊക്കെ എന്തുചെയ്യുന്നു .. എവിടെ ആണ് എന്നൊന്നും ഇപ്പോള്‍ അറിയില്ല . ഇതില്‍ ആനന്ദിനോടാരുന്നു ഞങ്ങള്‍ പെണ്‍കുട്ടികള്‍ക്ക് അടുപ്പം കൂടുതല്‍ ! എനിക്കവന്‍ ഇംഗ്ലീഷ് ഗ്രാമ്മര്‍ ഗുരു ആയിരുന്നു . ഗുരുവേ നമ:
നന്ദി നമസ്കാരം !

No comments:

Post a Comment