എന്റെ കൂട്ടുകാരന് ...

ഒരു ചേമ്പിലക്കുമ്പിൾ തുമ്പപ്പൂ
കടം തരുമോ കൂട്ടുകാരാ ...?
എൻ സ്നേഹത്തിൻ പൂക്കളം
ഒരുക്കാം ഞാൻ നിനക്കായി !
എന്നെയാ ബാല്യത്തിലേക്ക്
കൊണ്ടു പോകൂ കൂട്ടുകാരാ.. 
കൊതിയോടെ കാതോർക്കുമാ
കൗമാരമെങ്കിലും നേടുമോ
നമുക്കായി ഒരു വട്ടമെങ്കിലും ?
താമരത്തണ്ടിനാൽ തീർത്തൊരു
വരണമാല്യമണിയിച്ചോരാ
മധുരപ്പതിനേഴെങ്കിലുമെനിക്കു
തിരികെ തരുമോ ഒരിക്കൽ കൂടി ?
പാടവരമ്പത്തെ കൈതയ്ക്ക്
മറവിൽ എന്നിലേക്ക്‌ പകർന്നോരാ
ആദ്യ ചുംബനത്തിൻ ഈറൻ
മാറാത്തോരാ യൗവനമെങ്കിലും
എനിക്കായി അർപ്പിക്കുമോ ..?
തിരിച്ചു കിട്ടില്ലെന്നറിയുമെങ്കിലും
വെറുതെ ആശിച്ചു പോകുന്നു
ഞാൻ അവിടെ വച്ചു നിന്നിൽ
കടം കൊണ്ടതെല്ലാം തിരിച്ചു
നിന്നിലേക്ക്‌ പകരുവാൻ
എന്നെ തിരിച്ചെടുക്കുവാൻ ...!